錄影考試真係咁筍？🤔
「正啊可以錄到最好嗰次先交！」
「唔使考scale sight-reading aural 齋彈歌咁著數？」
通常學生一聽到樂器考試現在可轉為錄影模式，都會有呢啲反應，老師我只能說句，少年，你真的太年輕了😌
不過都幾好，可以借機引導學生學習多角度思考，究竟疫情下大行其道的錄影考試，係咪真係咁「著數」？
思考角度一：做人要識調返轉嚟諗 
當你認為可以錄到最好嗰次先交，你又有無諗過評分的考官同樣會expect 你已經交出窮了你一生功力去彈奏的影片，唔想俾機會佢咁諗「乜你彈到最好嗰次都係咁㗎咋?!」咁就真係要下啲苦功練好啲，錄到最好嗰次俾佢聽！
思考角度二：錄影淨係彈pieces = 懶人恩物？
乜你以為唔使考scale sightreading aural 真係好着數？先唔計唔使考你平時仲會唔會練(呢個就要睇吓你個人/ 老師對學習嘅追求)，當平時有呢啲supporting test 去將成份卷拉分(150 分佔60 分) ，宜家呢60 分變成了一首佔30分的自選曲同30 分的整體演奏評分，對於一個只係一直普通學琴唔係特別被訓練上台演出嘅學生來講，其實演奏要求相應係高咗。再者，如果個學生(老師) 唔係太自律，當你唔練(唔教) scale aural 等你嘅彈奏技術同聽力又係咪真係會好到令你彈pieces 可以彈得好好？
簡單啲講，千祈唔好以為錄影考試就一定比起傳統考試容易攞高分，其實都好睇老師點教同學生點學。
仲有，千其唔好以為Book 個又大又靚嘅場地錄影，用支專業少少嘅mic 嚟錄音，着靚啲set 靚埋個頭，考官就要俾高啲分你，依家唔係去玩全民造星，女仔唔係著條短啲嘅裙人哋就要俾你pass 嘅。
坊間有好多錄影考試嘅教學甚至廣告，卻很少有人同你講其實一個樂器考試最緊要係咩，下篇再分享。